Gröfin

Þegar fátækur bóndi biður ríkan nágranna sinn um að lána sér korn til að fæða börnin sín ákveður ríki bóndinn að gefa honum frekar kornið gegn því að hann vaki yfir gröfinni hans í þrjár nætur eftir hans dag. Fátæki bóndinn samþykkir boð nágranna síns grunlaus um afleiðingarnar. Þegar kemur að skuldadögum fyrir fátæka bóndann beitir hann ýmsum brögðum til þess að falla ekki fyrir freistingum Kölska sem taldi sig eiga tilkall til bóndans ríka.
Ævintýri Grimmsbræðra eru löngu orðin þekkt um allan heim enda verið þýdd á fleiri hundruð tungumál. Þjóðsögur Grimmsbræðra hafa tekið töluverðum breytingum í aldanna rás án þess þó að missa upprunalegan boðskap sinn og í dag ganga þjóðsögur Jacobs og Wilhelms einfaldlega undir nafninu Ævintýri Grimmsbræðra. Bræðurnir Jacob og Wilhelm fæddust í Þýskalandi. Þeir voru málvísindamenn og sömdu þjóðsögur til að efla og styrkja þjóðsagnalist heimalandsins.
Bræðurnir nutu töluverðrar hylli fyrir þjóðsögur sínar á 19. öld þótt margar þeirra hafi þótt verulega óhugnalegar. Meðal annarra þekktra ævintýra Grimmsbræðra eru Mjalllhvít, Rauðhetta og Öskubuska.